Raportohet për mbi 60 të vrarë nga një sulm izraelit në Gazë

Një sulm ajror izraelit ka goditur një shkollë të kthyer në qendër strehimi në qytetin e Gazës, në orët e hershme të së shtunës, duke vrarë më shumë se 60 persona, kanë thënë autoritetet shëndetësore palestineze, transmeton Radio Evropa e Lirë.

Ky mund të konsiderohet një prej sulmeve më vdekjeprurëse në luftën 10-mujore në mes të Izraelit dhe Hamasit.

Ushtria izraelite e ka pranuar sulmin, duke pretenduar se ka goditur një qendër komanduese të Hamasit brenda shkollës.

Hamasi, grup palestinez që udhëheq Gazën, është shpallur organizatë terroriste prej Shteteve të Bashkuara dhe Bashkimit Evropian.

Sulmi në shkollën Tabeen në qendër të Gazës, ka plagosur 47 persona, sipas autoriteteve.

Ky objekt, sikurse gati të gjitha shkollat e Gazës, është përdorur si qendër strehimi për njerëzit që janë detyruar të ikin nga shtëpitë e tyre, për shkak të luftës.

Sulmi ka ndodhur pa paralajmërim, teksa njerëzit kanë qenë duke u lutur në xhaminë brenda shkollës, sipas Abu Anas, një dëshmitari që ka punuar për t’i shpëtuar njerëzit.

“Raketa kanë rënë pa paralajmërim. Raketa e parë, e dyta. Ua kemi mbledhur copat e trupave”.

Besohet se në atë objekt kanë qenë 6.000 persona.

Sipas Kombeve të Bashkuara, 477 prej 564 shkollave në Gazë janë goditur direkt apo janë dëmtuar në luftë, deri më 6 korrik.

Sulmi ka ndodhur derisa ndërmjetësit prej Shteteve të Bashkuara, Katarit dhe Egjiptit, i kanë rritur përpjekjet për të arritur armëpushim në Gazë, dhe për t’i ulur tensionet në rajon, pas vrasjes së liderit politik të Hamasit, Ismail Haniyeh, në Teheran, si dhe një komandanti të lartë të Hezbollahut në Bejrut.

Fushata ushtarake e Izraelit në Gazë ka vrarë më shumë se 39.600 palestinezë, dhe ka plagosur më shumë se 91.000 të tjerë, sipas autoriteteve shëndetësore në Gazë.

Lufta është nxitur prej sulmeve të Hamasit, më 7 tetor të vitit të kaluar, pasi militantët e grupit kanë hyrë në jug të Izraelit, dhe kanë vrarë mbi 1.200 njerëz, si dhe kanë marrë peng 240 të tjerë.

Më shumë se 1.9 milion banorë të Gazës – rajon që para luftës ka pasur 2.3 milionë banorë – janë detyruar të largohen prej shtëpive të tyre.