Trump i drejtohet të krishterëve: Pas këtyre zgjedhjeve nuk do të duhet të votoni më

Kandidati republikan presidencial Donald Trump u tha anëtarëve të një organizate të krishterë të premten se nëse votojnë për të në nëntor, për katër vjet nuk do të duhet të votojnë më.

Është e paqartë se çfarë donte të thoshte ish-presidenti me komentin në një fushatë ku rivalët e tij demokratë e akuzojnë atë se përbën një kërcënim për demokracinë. Ekipi i tij i fushatës nuk iu përgjigj menjëherë një kërkese për sqarime mbi komentet e tij.

Trump i bëri komentet gjatë një ngjarjeje të organizuar nga organizata konservatore Turning Point Action në West Palm Beach, Florida.

“Të krishterë, shkoni votoni, vetëm këtë një herë. Nuk do të duhet më kurrë. Katër vjet të tjera, e dini, do të rregullohet, do të jetë mirë, nuk do të duhet të votoni më, të krishterët e mi të mirë”, tha Trump.

“Unë ju dua të krishterë, shkoni, ju duhet të shkoni dhe të votoni për katër vjet, ne do ta kemi bërë kaq mirë nuk do të duhet të votoni më”.

Në një intervistë në dhjetor me Fox News, Trump deklaroi se nëse fiton zgjedhjet e 5 nëntorit, do të veprojë si diktator, por vetëm “në fillim”, për të mbyllur kufirin jugor me Meksikën dhe për të zgjeruar shpimet e naftës.

Demokratët e shfrytëzuan atë koment dhe Trump reagoi se ishte një shaka.

Nëse Trump fiton një mandat të dytë në Shtëpinë e Bardhë, ai mund të ketë vetëm katër vite të tjera në detyrë. Presidentët e SHBA-së lejohen të shërbejnë vetëm dy mandate, njëkohësisht ose jo, sipas Kushtetutës së SHBA.

Në maj, duke folur në një mbledhje të Shoqatës Kombëtare të Pushkave (lobi më i fuqishëm për të drejtat e armëve në SHBA), Trump bëri shaka se do të shërbente më shumë se dy mandate si president.

Ai i referohej presidencës së demokratit Franklin Roosevelt, i vetmi president që ka shërbyer më shumë se dy mandate. Kufiri me dy mandate iu shtua Kushtetutës së SHBA pas presidencës së Roosevelt./abcnews.al