ЕУ бара дополнителни 50 милијарди евра од земјите-членки за помош на Украина

Европската комисија денеска побара од земјите-членки дополнителни 50 милијарди евра за буџетот на Унијата наменет за помош на Украина во текот на следните четири години.

Предлагаме финансиска резерва за следните четири години од 50 милијарди евра. Вклучува и заеми и субвенции, рече претседателката на Европската комисија Урсула фон дер Лајен на прес-конференција.

– Тие резерви ќе им дадат „перспектива“ на Украинците и треба да ги охрабрат и другите донатори да се вклучат, рече фон дер Лајен.

Ова ќе овозможи да се додели финансиска помош во зависност од развојот на ситуацијата на терен, рече таа, додавајќи дека сите знаат дека војната бара поголема флексибилност.

Зголемувањето на повеќегодишниот буџет на ЕУ за 2021-2027 година треба да биде едногласно одобрено од земјите-членки и да добие зелено светло од Европскиот парламент.

Фон дер Лајен предложи и зголемување на буџетот на ЕУ за 15 милијарди евра за управување со миграцијата. Тие средства ќе бидат наменети да им помогнат на земјите-членки да ја зајакнат контролата на надворешната граница на Унијата во соработка со трети земји.

Покрај тоа, таа побара дополнителни 10 милијарди евра за зајакнување на „отпорноста и конкурентноста“ на европската економија.

Текстот ЕУ бара дополнителни 50 милијарди евра од земјите-членки за помош на Украина е превземен од А1он.