A do të rikthehet Fehmi Kupina në pozitën e kryesuesit të Kuvendit Komunal? Flasin nga LVV e AAK

Kuvendi i Komunës së Prishtinës sot mban mbledhje të jashtëzakonshme për shkarkimin e kryesuesit të Kuvendit, Pëllumb Bajçinovci.

Karrigen e kësaj pozite, Front Online merr vesh se përflitet se do ta marr Fehmi Kupina, që dikur kishte qenë në këtë pozitë.

E një gjë të tillë, nuk e mohuan as nga Vetëvendosja, e as nga AAK-ja në Prishtinë.

Kur u pyet Shefi i këshilltarëve të LVV-së, Gëzim Sveçla pikërisht për këtë, tha që fillimish duhet të bëhet shkarkimi, e pastaj të flitet për emërim.

Ai tha se në mbledhjen e sotme do të bëhet vetëm shkarkimi i kryesuesit.

“Mbledhja ka të bëjë vetëm me shkarkimin, nuk pritet dhe nuk do të ketë asnjë emërim të ndonjë kryesuesi të ri. Hapi i parë është shkarkimi që diskutohet në mbledhjen e sotme, pastaj nëse kjo është e suksesshme thirret një seancë tjetër për emërimin. Nuk ka nevojë me u diskutu një hap para se hapi i parë të bëhet i suksesshëm, pa e shkarku kryesuesin komunal nuk kemi çka me fol për kryesuesin e ardhshëm”, ka thënë ai për Front Online.

Bahri Gashi nga AAK-ja në Prishtinë thotë që nuk kanë ndonjë marrëveshje me partitë opozitare.

Front Online pyeti Gashin nëse do ta përkrahnin si parti emërimin e Fehmi Kupinës.

Ai nuk e mohohi një gjë të tillë.

“E kemi diskutuar, por opozita nuk e ka një front të përbashkët ku ulet dhe i diskuton të gjitha veprimet e veta sepse ne nuk kemi një marrëveshje me shkrim, varësisht prej qëndrimeve tona politike dhe partiake. Fehmi Kupina ka qenë një herë kryesues është shkarkuar prej partisë së vet, tani është asamblist i pavarur. Ta shohim si vjen puna, të shohim si po vjen seanca tjetër, jemi aty për të qenë çdo herë prezent në sallë”, u shpreh ai për Front Online.

Inicimi për shkarkim të kryesuesit ka ardhur pas prishjes së koalicionit LDK-PDK në nivelin ekzekutiv, duke e lënë në pushtet LDK-në, që tashmë është pakicë në Kuvendin e Komunës.

Mbledhja e Kuvendit komunal pritet të fillojë në ora 15:00./Front Online/