Osmani në OKB: Serbia do Veriun e Kosovës, por nuk do ta marrë kurrë

Presidentja e Republikës së Kosovës, Vjosa Osmani, ka theksuar se Kosova dëshiron dialog në mënyrë të drejtë dhe të balancuar dhe se Kosova është një Republikë e lirë, e pavarur dhe sovrane dhe e tillë do të mbetet përderisa Toka të rrotullohet rreth diellit.

Në fjalën e saj, presidentja e Kosovës, Vjosa Osmani, theksoi se Prishtina dëshiron dialog.

“Ne duam paqen dhe me 24 shkurt Serbia tregoi se dëshiron luftë. Ne nuk do t’i lejojmë ta fitojnë atë. Demokracia dhe liria gjithmonë fitojnë”, tha Osmani.

Ajo theksoi se Kosova është një Republikë e lirë, e pavarur, sovrane dhe demokratike dhe e tillë do të mbetet përderisa Toka të rrotullohet rreth diellit.

“Megjithë viktimat e shumta, ne kemi vendosur të ngrihemi nga hiri. Ne jemi një vend ku parimet e demokracisë dhe sundimi i ligjit janë themelet kryesore. Një vend që ka vendosur të bashkëpunojë me Serbinë dhe të marrë pjesë në një dialog që duhet zgjidhur problemet në mënyrë paqësore”, tha ajo.

Sipas saj, është vendosur edhe pse Serbia nuk është penduar dhe as nuk ka kërkuar falje për krimet dhe se është Serbia ajo që po bën gjithçka për ta kthyer rajonin në vitet e 90-ta.

“Unë jam këtu për të thënë se nuk do ta lejojmë. Ne po shkojmë përpara, jo mbrapa. Nuk do të lejojmë të kthehet e kaluara, as të rrezikohen të arriturat tona”, tha Osmani.

Ajo përsëriti se Kosova është suksesi më i madh i demokracisë dhe dëshmia se “çfarë mund të bëjnë demokracitë së bashku kur ngrihen kundër regjimeve autokratike dhe gjenocidale”.

Për ngjarjet në Banjskë , Osmani tha se më 24 shtator qytetarët e Kosovës janë zgjuar nga polici i vrarë.

“Atë ditë Kosova ishte nën agresionin e Serbisë”, tha Osmani, duke shfrytëzuar rastin për të nderuar policin e rënë Afrim Bunjaku, të cilin e quajti “heroi i Kosovës”

Pas 24 shtatorit gjithçka ndryshoi, dhe vendosmëria e vazhdueshme e Serbisë është që të pushtojë territorin, siç është aneksimi i Krimesë, deklaroi Osmani dhe theksoi se Kosova vazhdon të bashkëpunojë me partnerët ndërkombëtarë, për të parandaluar ngjarje të tilla.

“Ajo që dëgjuam sot nga Serbia është refuzimi i deeskalimit. Ata duan të paraqiten si viktima të agresionit, por faktet tregojnë të kundërtën. Ato grupe terroriste janë financuar, trajnuar në Serbi. Financimi i dy organizatave terroriste “Mbrojtja Civile” dhe “Brigada Veriore” vjen nga autoritetet serbe. Ata paguhen nga Serbia për të sulmuar serbët e Kosovës. Hetimi tregon se ka trajnime të vazhdueshme ushtarake në bazat ushtarake në Pasuljanski Livade dhe Rashkë”, tha Osmani, duke shtuar se armët e konfiskuara mjaftonin për 400 persona.

” Milan Radoiçiq, i cili pranoi se ai e udhëhoqi atë sulm , është bashkëpunëtor i ngushtë i presidentit serb Vuçiq dhe është ende i lirë, dhe Serbia shpalli ditë zie për ata që vranë policin,” vuri në dukje ajo.

Siç tha ajo, ajo që ndodhi në shtator nuk ishte vetëm një sulm ndaj Kosovës, por një plan për të destabilizuar të gjithë rajonin.

“Qeveria serbe thotë me cinizëm se 24 shtatori është përgjigja e serbëve ndaj presionit dhe terrorit. Është rezultat i dëshirës serbe për më shumë territor. Kosova është atdheu juaj po aq edhe imi”, u tha ajo serbëve dhe shtoi:

“Serbia e dëshiron Veriun e Kosovës, të cilin nuk do ta marrë kurrë”./FrontOnline/