Shaqiri: Është marre me pa bota në çfarë stadiumi luan Kosova

Ylli shqiptar i Zvicrës, Xherdan Shaqiri është shprehur i lumtur që Zvicra është kualifikuar në Evropianin e vitit të ardhshëm.

“Vërtetë kam dashur të luaj dhe ta ndihmoj ekipin. Jam i lumtur që isha në gjendje të luaj nga fillimi. Ndoshta nuk ishte ndeshja ime më e mirë. Fusha nuk ishte më e mira po ashtu. Qartë se nuk është cikli më i mirë kualifikues që kemi luajtur. Por ia dolëm sërish. Asnjëherë nuk është e lehtë të kualifikohesh në ngjarjet e mëdha. Ekipi dhe tifozët mund të jenë krenarë. Natyrisht tani duam ta fitojmë grupin. Më pas mund të përgatitemi për turneun në Gjermani”, ka thënë Shaqiri pas ndeshjes me Kosovës.

Shaqiri u pyet për gjasat e Kosovës të kualifikohet në ngjarje madhore në të ardhmen.

“Shpresoj që një ditë Kosova të kualifikohet. Duhet me pas ambient të mirë mes vete, mes lojtarëve. Duhet me ndreq stadiumin se është marrë me pa bota atë fushë. Dhe kur të rregullohen këto gjëra të vogla, kualifikoheni”, ka thënë Shaqiri.