Humolli kritikon ndërkombëtarët për qasje joneutrale: Lajçaku e Escobari janë proserbë

Fatmir Humolli, deputeti i Kuvendit të Kosovës, ka kritikuar bashkësinë ndërkombëtare se nuk është neutrale në raport me Kosovën e Serbinë.

Në emisionin “FIVE”, Humolli ka thënë se ndërkombëtarët po i bëjnë presion Kosovës e jo Serbisë, e cila kreu krime në Kosovë, duke thënë se kjo vjen për shkak të dobësisë së klasës politike.

“E kemi presionin ndaj Gjykatës Speciale që ka qenë presion poshtërues, klasa perëndimore duke parë klasën tonë politike që i pranon kompromiset, bën presion. Bashkësia ndërkombëtare i bën presion Kosovës, e jo Serbisë e cila kreu krime. I bën presion fundamentalizmit islamik e jo atë ortodoks sllav. Bashkësia ndërkombëtare nuk është korrekte në raport me proceset historike për shkak të dobësisë së klasës tonë politike”, ka deklaruar Humolli.

Sipas tij, krejt kjo vjen pasi Kosova ka pranuar kompromise të shumta dhe bashkësia ndërkombëtare godet kur sheh dobësi të klasës politike.

Ai ka kritikuar emisarin e BE-së, Miroslav Lajçak, se është proserb dhe emisarin amerikan, Gabriel Escobar, duke thënë se “ka flejtur në kishën që bekoi kriminelët serbë”.

Sipas Humollit, bombardimi i NATO-s ndaj Serbisë ka qenë vetëm një shuplakë në sy të botës.