KQZ miratoi listën e qendrave të votimit në veri , Ahmetaj: Janë 23 lokacione në të cilat do të organizohet procesi i votimit më 21 prill

Komisioni Qendror i Zgjedhjeve (KQZ), ka miratuar listat e qendrave të votimit ku pritet që më 21 prill të votohet “për” apo “kundër” shkarkimit të kryetarëve të tanishëm të katër komunave veriore të Kosovës, Mitrovica e Veriut, Zveçan, Leposaviq dhe Zubin Potoku.

Kështu tha kryesuesi i Sekretariatit të KQZ-së, Burim Ahmetaj

Sipas tij, janë gjithsej 23 qendra të votimit në të cilat do të organizohet procesi i votimit, ku shumica e lokacioneve sipas tij janë hapësira të komunave apo pronë shtetërore.

“Është miratuar lista e qendrave të votimit nga KQZ-ja. Janë gjithsej 23 qendra të votimit në të cilat do të organizohet procesi i votimit, ku në këto 23 qendra të votimit janë të përfshira të gjitha qendrat e votimit në të cilat janë miratuar paraprakisht prej KQZ-së. Të gjitha qendrat e votimit dhe vend votimet që kanë qenë paraprakisht të caktuara për to kemi siguruar hapësira dhe lokacione ku do të organizohet procesi i votimit” tha ai për Telegrafin.

Ai po ashtu tregoi dhe se sa lokacione janë veç e veç në katër komunat veriore.

“Në Leposaviq janë 8 lokacione ku të organizohet votimi i 18 qendrave të votimit. Në Zveçan pesë lokacione, në Zubin Potok pesë dhe në Mitrovicë të Veriut pesë lokacione dhe shumica e tyre janë objekte të komunës apo pronë shtetërore.”

Ndryshe, në bazë të vendimit të KQZ-së për certifikimin e listës së votuesve për procesin e votimit që do të mbahet më 21 prill, numri i qytetarëve me të drejtë vote në komunat Leposaviq, Zubin Potok, Zveçan dhe Mitrovicë e veriut është: 46,556 votues apo 1,461 votues më shumë në krahasim me zgjedhjet e mbajtura para një viti, më 23 prill 2023, sipas Elezit.