Një burrë vdiq pasi i vuri flakën vetes jashtë gjykatës së Nju Jorkut ku po zhvillohej gjyqi i Trump

Një burrë ka vdekur pasi i vuri flakën vetes jashtë gjykatës së Nju Jorkut, ku po zhvillohet gjyqi i Donald Trump për ‘hush-money’, transmeton Portalb.mk nga The Guardian.

Departamenti i policisë së Nju Jorkut tha të shtunën se personi ishte shpallur i vdekur nga stafi në një spital të zonës.

Zyrtarët kishin thënë më herët se burri, i cili ishte në fund të të 30-tave, ishte në gjendje kritike.

Departamenti i policisë së Nju Jorkut tha se njeriu, të cilin ata e identifikuan si Max Azzarello nga St. Augustine, Florida, nuk dukej se targetonte Trumpin ose të tjerët të përfshirë në gjyq.

Dëshmitarët thanë se burri nxori pamflete nga një çantë shpine dhe i hodhi në ajër përpara se ta lagte veten me një lëng dhe t’i vinte flakën të premten.

“Tani për tani ne po e etiketojmë atë si një lloj teoricien konspiracioni dhe po largohemi prej andej,” tha në një konferencë shtypi Tarik Sheppard, zëvendëskomisar në departamentin e policisë.

Shtëpia e gjykatës në qendër të Manhattanit, e ruajtur shumë nga policia, tërhoqi një turmë protestuesish dhe shikuesish të hënën, ditën e parë të gjyqit, por turmat janë pakësuar që atëherë.

Autoritetet thanë se po rishikonin protokollet e sigurisë në zonë.