Ageler: Nuk jam në dijeni të ndonjë ndikimi konkret rus në zgjedhje, por jam e sigurt se ka
Ambasadorja amerikane në vend, Angela Ageler, tha sot se nuk është në dijeni të ndonjë ndikimi specifik dhe eksplicit rus në zgjedhjet e këtij viti, por se është e bindur se i njëjti është i pranishëm, transmeton Portalb.mk. Duke iu përgjigjur pyetjeve të gazetarëve pas nënshkrimit të memorandumit për zbatimin e programit të shkëmbimeve akademike […]
Ambasadorja amerikane në vend, Angela Ageler, tha sot se nuk është në dijeni të ndonjë ndikimi specifik dhe eksplicit rus në zgjedhjet e këtij viti, por se është e bindur se i njëjti është i pranishëm, transmeton Portalb.mk.
Duke iu përgjigjur pyetjeve të gazetarëve pas nënshkrimit të memorandumit për zbatimin e programit të shkëmbimeve akademike Fulbright me ministrin e Arsimit dhe Shkencës, Jeton Shaqiri, Ageler tha se më e rëndësishmja për qytetarët është që të edukohen mirë për kandidatët në procesin zgjedhor.
“Nuk kam njohuri që ka ndonjë ndikim eksplicit dhe specifik, por kam besim se është këtu, sepse në përgjithësi ekziston në rajon. Mendoj se gjëja më e rëndësishme në këtë sezon zgjedhor është që qytetarët e këtij vendi t’u bëjnë pyetje kandidatëve dhe të marrin parasysh prioritetet e tyre kur ata votojnë. Për mua, kjo është gjëja më e rëndësishme, dhe natyrisht të edukohen për procesin dhe për kandidatët, pavarësisht se kush mund të ndërhyjë, ky është mjeti më i rëndësishëm që ata kanë”, tha ambasadorja amerikane Ageler.
Ministri i Arsimit dhe Shkencës, Jeton Shaqiri dhe ambasadorja e Shteteve të Bashkuara të Amerikës në Maqedoninë e Veriut, Angela Ageler, nënshkruan sot memorandum për vazhdimin e zbatimit të programit të shkëmbimit akademik Fullbrajt.
“Të dyja palët e shohim përfitimin e Programit Fullbrajt. Shkëmbimi i njohurive dhe përvojave është i mirëseardhur gjithmonë edhe për SHBA-në, si vend udhëheqës në botë në shumë fusha dhe sipas shumë parametrave, e në veçanti për Maqedoninë e Veriut si vend në zhvillim, i cili vazhdimisht përpiqet të ndjekë trendet dhe standardet globale arsimore dhe shkencore”, deklaroi ministri Shaqiri.
Interesi për qëndrim studimor ose hulumtues në SHBA është gjithmonë i madh, sepse çdo vit ka rreth 40 universitete amerikane të cilat rangohen ndër 100 më të mirët në botë. Këtë vit ka mundësi për numër më të madh pjesëmarrësish në krahasim me vitet e kaluara, duke marrë parasysh se pjesëmarrja financiare në program është rritur.
“Memorandumi për mirëkuptim që Stejt Departamenti i Shteteve të Bashkuara dhe Ministria e Arsimit dhe Shkencës po e nënshkruajnë sot, në bazë është për dy gjëra: arsimim dhe mirëkuptim. Duke rritur kontributin e saj në programin Fullbrajt nga 150,000 dollarë në 260,000 dollarë, Ministria invesnton në persona dhe të ardhmen e Maqedonisë së Veriut”, theksoi ambasadorja Ageler, duke shtuar se që nga viti 1991, më shumë se 350 qytetarë e kanë shfrytëzuar mundësinë për të studiuar në Shtetet e Bashkuara përmes programeve Fullbrajt, e më pas u kthyen në vendin e tyre për të ndihmuar në ndërtimin e ekonomisë më të shëndetshme dhe standard më të mirë jetese.
Duke theksuar se alumni i programit Fullbrajt sot janë aktivë në qeveri, akademi, shkencë, financa dhe pothuajse në çdo sektor të shoqërisë, ambasadorja Ageler tha se më shumë se 270 amerikanë kanë vazhduar aktivitetet e tyre akademike këtu dhe janë kthyer në Shtetet e Bashkuara me zhvillim të rikrijuar për rolin dhe vlerën e Maqedonisë së Veriut në Evropë dhe rëndësinë e marrëdhënieve tona bilaterale.
