Heqja e “balancuesit”, kusht i VMRO-së për partitë shqiptare
“Përgatitja profesionale para përkatësisë etnike gjatë punësimeve” – ky do të jetë kushti i VMRO DPMNE-së për të gjitha partitë politike shqiptare për pjesëmarrje në Qeverinë e re të Maqedonisë së Veriut, pas 8 majit, raporton REL. Kryetari i partisë opozitare maqedonase, Hristijan Mickovski, duke prezantuar programin e partisë për zgjedhjet parlamentare, tha se një […]
“Përgatitja profesionale para përkatësisë etnike gjatë punësimeve” – ky do të jetë kushti i VMRO DPMNE-së për të gjitha partitë politike shqiptare për pjesëmarrje në Qeverinë e re të Maqedonisë së Veriut, pas 8 majit, raporton REL.
Kryetari i partisë opozitare maqedonase, Hristijan Mickovski, duke prezantuar programin e partisë për zgjedhjet parlamentare, tha se një nga pikat kryesore është shfuqizimi i atij që njihet si Balancues – një mekanizëm ligjor për përfaqësim të drejtë dhe adekuat gjatë shpalljes së konkurseve për punësim në institucionet dhe ndërmarrjet publike në nivel lokal dhe shtetëror.
Nga VMRO-ja vlerësojnë se si pasojë e këtij mekanizmi, institucionet janë “mbushur me kuadro të pakualifikuara”, pasi në vend të arsimimit, për bazë është marrë përkatësia etnike, për të ruajtur balancën etnike në institucionet ku ata janë punësuar.
“Balancuesi” është pjesë e ndryshimeve kushtetuese të miratuara në vitin 2002 pas konfliktit të armatosur në vitin 2001 në Maqedoninë e Veriut.
Ndryshe, koalicioni i udhëhequr nga VMRO-DPMNE i quajtur “Maqedonia juaj” është koalicioni më i madh deri më tani, i përbërë nga 24 subjekte dhe organizata politike që qëndrojnë pas valës së ndryshimeve që duhet të sigurojnë një Maqedoni stabile dhe të fortë. Kështu tha lideri i VMRO-DPMNE-së Hristijan Mickoski para selisë së partisë dhe theksoi se kanë nënshkruar statutin për koalicion strategjik dhe vendosjen e parimeve të punës së ardhshme të koalicionit të udhëhequr nga VMRO-DPMNE i quajtur “Maqedonia juaj”.
Zgjedhjet parlamentare do të mbahen më 8 maj së bashku me raundin e dytë të zgjedhjeve presidenciale. Fushata për zgjedhjet parlamentare do të fillojë më 18 prill dhe do të zgjasë deri më 6 maj.
