Lavrov: Perëndimi po vret OSBE-në! Zyrtarët braktisin mbledhjen sapo ministri rus nisi fjalimin

Një sërë zyrtarësh janë larguar nga një seancë e takimit të ministrave të OSBE-së ndërsa ministri i jashtëm rus Sergei Lavrov nisi fjalimin. Ministri rus u tha homologëve të tij se OSBE-ja është në buzë të një gremine dhe se Perëndimi po shkatërron të gjitha shanset për të ringjallur grupin.

Ministri i Punëve të Jashtme të Rusisë, Sergej Lavrov, tha sot në fjalimin e tij në Këshillin e Ministrave të OSBE-së se kjo organizatë është në gjendje të dhimbshme dhe se perspektivat e saj nuk janë të qarta.

“Për pak më shumë se një vit, Akti Final i Helsinkit do të jetë 50 vjeç. Me keqardhje themi se OSBE-ja e mirëpret këtë përvjetor në një gjendje të dhimbshme dhe perspektivat janë të paqarta,” tha Lavrov.

Ai deklaroi se ishin vendet e NATO-s dhe të Bashkimit Evropian që shkatërruan dimensionin ushtarako-politik të OSBE-së, në vitin 1999. Në atë kohë, kujton ai, NATO kreu një agresion të rëndë kundër Jugosllavisë, një anëtare e OSBE-së dhe OKB-së.

“Dhe në vitin 2008, në kundërshtim me Rezolutën 1244 të Këshillit të Sigurimit të OKB-së dhe parimin e paprekshmërisë së kufijve në Evropë nga Akti Final i Helsinkit, Serbisë iu grabit Kosova pa asnjë referendum”, tha Lavrov.

Sipas tij, vendet perëndimore përdorin OSBE-në për interesat e NATO-s.

Ai gjithashtu deklaroi se Perëndimi, duke vendosur sanksione ndaj Rusisë, donte të shkatërronte ekonominë ruse dhe se BE-ja po i bindet Amerikës në këtë drejtim.

“SHBA dhe satelitët e saj evropianë kanë vendosur mijëra sanksione ndaj Rusisë, duke i dhënë fund bashkëpunimit të gjerë praktik midis Lindjes dhe Perëndimit në rajonin tonë dikur të përbashkët”, tha Lavrov.

Ai deklaroi se qëllimi i Kievit është çrrënjosja e gjithçkaje ruse, në të cilën, thotë ai, ka kapërcyer gjithçka deri më tani, sepse në Ukrainë mohohet ekzistenca e rusëve dhe roli i tyre kyç në krijimin e Ukrainës.

“Atje, njerëzit janë të privuar nga kontakti me kulturën, gjuhën, librat dhe mediat ruse dhe OSBE-ja hesht për këtë,” tha Lavrov.

Brukseli vazhdon të heshtë, i cili nuk vë në dukje se është e nevojshme të respektohen të drejtat e të gjitha pakicave kombëtare, siç parashikojnë dokumente të shumta.

“Ata që supozohet të sigurojnë lirinë e mediave heshtin kur i pyesim pse mbyllen të gjitha mediat që shkruajnë atë që nuk pajtohet me ideologjinë e Perëndimit”, tha Lavrov./FrontOnline/