Refuzimi i Bislimit për takim rreth dinarit, Petrich: Kosova e vuri BE-në në pozitë të vështirë

Brukseli duhet të veprojë me vendosmëri, sepse refuzimi i bisedimeve është sjellje e papranueshme, ka thënë ish i dërguari i Bashkimit Evropian për Kosovën, Wolfgang Petriç, pas refuzimit të zëvendëskryeministrit të Kosovës, Besnik Bislimi, t’i përgjigjet ftesës së Brukselit për të diskutuar ndalimin e dinarit serb në Kosovë.

“Qëndrimi im ndaj asaj mase që më befasoi është kritik. Besoj se çdo çështje e tillë, pavarësisht se sa legjitime politikisht apo jo, duhet të diskutohet”, tha Petriç për Kosova Online, transmeton FrontOnline.

Ai ka theksuar se është e nevojshme të arrihet një marrëveshje me ata që preken nga kjo masë, përkatësisht serbët në Veri të Kosovës, por edhe shqiptarët dhe të tjerët që marrin pensione serbe.

“Kur dëgjova për këtë masë, thashë se nuk ishte një vendim i mençur politik i kryeministrit Albin Kurti, sepse besoj se vetëm rrit tensionet. Krijimi i pakuptimtë i një situate që rrit tensionet është diçka që duhet refuzuar.” shtoi Petriç.

Ai theksoi se tani, kur është miratuar dekreti, me ndihmën e BE-së dhe mbështetjen e SHBA-së, duhet gjetur një zgjidhje tranzitore, një rrugë kompromisi.

“Para së gjithash, është e nevojshme të shikohet përfitimi dhe dëmi i të prekurve. Kjo është gjëja kryesore për t’u marrë në të ardhmen e afërt,” tha Petriç.

Edhe pse, thotë ai, nuk e di se për çfarë po mendohet në Bruksel, nuk ka dyshim se duhet të veprojë me vendosmëri.

“Refuzimi i bisedimeve është një qëndrim i papranueshëm”, theksoi Petriç.

Ai kujton gjithashtu se ky është një vit elektoral dhe se në rrethana të tilla shpesh politika “teston kufijtë, deri ku mund të shkohet pa pasoja”.

“Kjo ka qenë padyshim mendimi në Prishtinë, duke pasur parasysh se në qershor do të mbahen zgjedhjet për Parlamentin Evropian dhe më pas do të themelohet Komisioni i ri Evropian. Kjo e ka vënë Prishtinën në pozitë të vështirë, sepse nuk është plotësisht efektive. Natyrisht, ka ende Miroslav Lajçak, Josep Borrell, ka një administratë evropiane që merret me atë çështje, por pesha politike është në rënie. Për sa kohë që po zhvillohet fushata zgjedhore, nuk ka komision të ri evropian. Është vendosur nëse Lajçak do të vazhdojë misionin, kush do të udhëheqë politikën e jashtme të BE-së… Këto janë të gjitha çështje që do të zgjidhen gjatë muajve të ardhshëm, prandaj jam pesimist se do të ketë një zgjidhje të mirë para zgjedhjeve”, tha Petriç.

Prandaj ai beson se me çdo kusht dhe me presion të shtuar nga Brukseli duhet të tentohet të arrihet të paktën një zgjidhje e përkohshme, që qytetarët të mos vuajnë.

I pyetur nëse është e mundur të ketë një raund tjetër dialogu në nivelin më të lartë para zgjedhjeve evropiane, ai përgjigjet se është spekulative nëse dialogu në fazën para zgjedhjeve është i leverdishëm apo nëse të dyja palët presin zgjedhjet që do të mbahen në Europë dhe SHBA.

“Zgjedhjet në BE dhe SHBA do të përcaktojnë ndjeshëm skenarin e ri dhe mjedisin e ri politik, si dhe mundësitë për negociata”, tha Petriç./FrontOnline/