Grabitet postieri në Pejë: I maskuari ia vjedh çantën me 2 mijë euro

Qëllimin e kishte të qartë, grabitjen e parave. Maska mjekësore për fshehje të identitetit i kreu punë një burri në Pejë, i cili bëri një vjedhje të premten rreth orës 18:50, në rrugën “Konstandini i Madh”.

Viktima qe punëtori i një poste të shpejtë. Të njëjtit dyshohet se iu vodh çanta me gjithë pazarin ditor me vlerë rreth 1 mijë e 500 – 2 mijë euro.

Ky i fundit edhe është sulmuar fizikisht duke u goditur disa herë me grushte.

I dyshuari mbetet ende i paidentifikuar, derisa organet e rendit po e hetojnë ngjarjen si “Grabitje”.

“I dyshuari nga vendi i ngjarjes është larguar në këmbë. Në lidhje me rastin është konsultuar prokurori i shtetit. Rasti vazhdon të hetohet”, bënë me dije nga Policia.

Klan Kosova ka kontaktuar me kompaninë me seli në kryeqytet, ku ishte i punësuar viktima, mirëpo të njëjtit nuk kanë dhënë detaje për ngjarjen.

Vetëm kanë pohuar se rasti është i izoluar dhe se dhënia e informatave do t’i pengonte Policisë në trajtimin e tij.