Shoigu vizitoi trupat ruse në Ukrainë për të treguar se ende është në krye pas rebelimit të Wagnerit

Ministri rus i Mbrojtjes Sergei Shoigu vizitoi trupat ruse që luftojnë në Ukrainë, paraqitja e tij e parë publike që nga rebelimi i Wagnerit. Shoigu deri më tani nuk ka komentuar publikisht mbi kryengritjen, gjatë së cilës Yevgeny Prigozhin kërkoi ta takonte atë në Rostov-on-Don, i cili ishte nën kontrollin e rebelëve të shtunën, transmeton Portalb.mk.

Mediat shtetërore ruse nuk thanë se ku dhe kur u zhvillua vizita, për të cilën analistët thanë se kishte për qëllim të tregonte se Shoigu është ende në krye.

Kryebashkiaku i Moskës Sergei Sobyanin hoqi këtë mëngjes masat anti-terroriste që ishin njoftuar të shtunën ndërsa autokolona e Wagnerit i afrohej kryeqytetit. Komiteti rus anti-terrorist arriti në përfundimin se situata në vend është stabile.

Rusia po përpiqet të rifitojë qetësinë pasi u përball me krizën e saj më të madhe të sigurisë në dekada, në të cilën mijëra mercenarë të armatosur rëndë të Wagnerit marshuan drejt Moskës për të rrëzuar udhëheqjen ushtarake ruse “të korruptuar dhe të paaftë” të udhëhequr nga Shoigu. Ata u ndalën 200 kilometra larg qytetit, pasi Prigozhin pranoi marrëveshjen e liderit bjellorus Lukashenko.

Edhe Putini ende nuk është shfaqur në publik që nga fundi i rebelimit. Është bërë e ditur se ai do të marrë pjesë në një takim të Këshillit të Sigurimit të Rusisë këtë javë.